Skemmtilegustu og leiðinlegustu vellirnir

Ég er svona að velta fyrir mér hvar sé skemmtilegast að spila þ.e hvaða útivellir eru skemmtilegastir. Auðvitað er þetta persónulegt og margt sem spilar inní eins og árangur á viðkomandi velli, stemmning o.s.frv. Ég ætla að raða völlum deildarinnar niður í sæti

 

11 sæti-Valbjarnarvöllur.

Ég set hann í neðsta sæti aðallega vegna þess að völlurinn sjálfur er slæmur. Að vísu er hann með betra móti í ár og sætin setja meiri svip á stúkuna. Svo spilar náttúrlega inní að ég man ekki eftir að hafa unnið leik þarna fyrr en auðvitað núna í fyrstu umferð og þá með Fjölni. Einnig er pirrandi hvað búningsklefinn er langt frá vellinum.

10. sæti-Laugardalsvöllur.

Aðalástæða þess að sjálfur þjóðarleikvangurinn nær ekki hærra í mínum bókum er sú að það næst svo lítil stemmning á vellinum. 1000 manns virka eins og 10 manns í 1500 manna stúku því fólkið hverfur algjörlega í sætafjöldann. Völlurinn er samt alltaf í toppstandi og sjálfsagt væri völlurinn í toppsætinu ef hann væri fullur í hverjum leik

9. sæti-Keflavíkurvöllur

Það sem er að Keflavíkurvellinum er að hann er staddur í Keflavík. Svo hefur maður nú tapa einhverjum leikjum þarna og það er ekkert leiðinlegra en fyrir Grindvíking að tapa á móti Keflavík.

8-7 sæti-Kópavogsvöllur

Ég vil byrja á því að taka það fram að ég hef ekki spilað á vellinum eftir að nýja stúkan kom. Áður fyrr voru þeir með litla stúku sem var yfirleitt tóm. Það hefur mikið vatn runnið til sjávar hjá þeim Kópavogsbúum síðan ég spilaði síðast en ég er að taka mið á minni reynslu.

6. sæti-Akranesvöllur.

Á Akranesi eru allar knattspyrnuaðstæður til fyrirmyndar og mörg lið hér í Reykjavík gætu litið upp til þeirra.  Ég hef einu sinni í 13 heimsóknum mínum þangað unnið þannig að minningar mínar eru ekki góðar þaðan. Svo er yfirleitt svolítið langt fyrir Grindvíkinga að fara þangað þannig að þeir hafa nú ekki fjölmennt þangað í gegnum árin.

5.sæti-Fylkisvöllur.

Maður hefur nú nokkrum sinnum náð skemmtilegum úrslitum þar og yfirleitt um hörkuleiki að ræða. Aðstæður eru fínar og oftast þétt setið og ágætis stemmari á leikjum sem ég hef spilað þarna. Svo bjóða þeir appelsínugulu alltaf uppá hörkuhlaðborð eftir leiki.  

4.sæti-FH völlur

Síðustu ár hefur verið gaman að spila í Hafnarfirði ef að undan er tekið 8-0 tap þar fyrir einum fjórum árum síðan. Reyndar höfum við Grindvíkingar ekki riðið feitum hesti þaðan en stemmningin hefur bara verið þannig að það er alltaf gaman að fara þangað. Svo hefur ferðalagið ekki verið lengra en 25mín fyrir okkur úr Grindavík þannig að það er plús. Reyndar kinnbeinsbrotnaði ég þar síðast þegar að ég spilaði þarna þannig að það er eiginlega spurning um að færa völlinn aðeins neðar í töfluna....

3.sæti-Hlíðarendi (Vodafone völlur)

Ég hef unnið nokkuð oft á þessum velli og það sem meira er þá hef ég líka skorað nokkur mörkin þarna líka. Árangur minn er semsagt það sem er að rífa Hlíðarendann upp töfluna. Völlurinn hefur alltaf verið góður og fínn stemmari. Ég spilaði svo opnunarleik nú á dögunum og það var bara frábært þannig að það eru fleiri góðar minningar þaðan en slæmar.

2.sæti-Frostaskjól

Manni hlakkar alltaf til að spila þarna. Það er alltaf frábær stemmning þarna og fullt af fólki. Eins furðulegt og það hljómar þá höfum við í Grindavík yfirleitt spilað vel þarna og náð frábærum úrslitum. Ég man í fljótu bragði eftir einhverjum mörkum sem maður hefur sett þarna og því situr þessi forni völlur örugglega í örðu sæti.

1.sæti-Grindavíkurvöllur.

Auðvitað er þessi völlur í lang fyrsta sæti hjá mér. Ég er með mikið mun fleiri sigurleiki þar heldur en tap og ef 30 og eitthvað mörkum sem karlinn hefur potað inn í efstu deild eru klárlega 20 og eitthvað á þessum velli. Ekki skemmir fyrir að við Fjölnismenn fórum þaðan með 3 stig nú á dögunum

 

Óli Stefán.......sem setur Akureyrarvöll ofarlega á lista yfir skemmtilega útivelli 

Leikur á sjómannadag!!!

Mikið hefur verið rætt um ömurlega leikjaniðurröðun KSÍ í sumar. Ekkert nema endalausir sunnudags og mánudagsleikir svo að fólk geti verið komið heim úr útilegu og náð leik um kvöldið. Lítið sem ekkert verið að hugsa um fjölskyldu leikmanna sem þurfa þá að æfa allar helgar í sumar.

Nú til að bæta gráu ofan á svart henda KSÍ menn nú leik á sjálfan Sjómannadaginn. Ég geri mér grein fyrir því að flestir af þessum skrifstofukörlum hafa náttúrlega aldrei migið í saltan sjó, en hefur ekki allavega helmingur landsmanna gert það? Fyrir mig og aðra sem koma úr sjávarþorpum er þessi dagur heilagur og t.d koma yfir 10 þúsund manns til Grindavíkur á sjómannadaginn. Alveg er ég pottþéttur á því að ef að það væri einhverskonar skrifstofudagur þá yrði það álíka heilagur dagur og aðfangadagur og ekki nokkur leikur spilaður í þeirri viku eða vikuna á eftir.  

Ég sem sjómannssonur sem er kominn af mikilli sjómannaætt er hundóánægður að þurfa að spila á þessum degi. Menn þurfa aðeins að spá í fleiri hlutum en fólki sem fer í útilegu og þarf að vera komið heim fyrir kickoff á sunnudegi.

Óli Stefán.......sem mælir með því að KSÍ hendi bara næst umferð á 17.júní

Jarðskjálftar

Mér líður alltaf afar illa þegar að þessir blessaðir jarðskjálftar ríða yfir. Í dag var ég heima að vaska upp þegar að allt fór á fullt. Myndir á veggjum fóru af stað og mikil læti í öllu húsinu. Ekki veit ég hvað hann mældist hér en hann virkaði ansi öflugur. Allavega það öflugur að ég stökk undir dyrakarminn á svölunum.

Þegar að skjálftinn stóri kom árið 2000 minnir mig þá átti ég heima á annarri hæð í blokkaríbúð í Grindavík. Þá sveiflaðist öll blokkin og munir hrundu af veggjunum. Síðan þá hefur manni alltaf liðið illa í þessum skjálftum og bara svona lítil atvik minnir mann á hvað við erum ótrúlega lítil gagnvart náttúrunni. 

 

Óli Stefán.....sem að var að pissa eitt sinn þegar að það kom skjálfti sem að gerði það að verkum að eftir skjálftann þurftu sumir að fara á niður á kné og þvo klósettgólfið í kringum skálina.

Jarðskjálfti við Ingólfsfjall

A la Tommi Leifs

Tommi Leifs liðsfélagi minn er nokkuð lúmskur á brandarana. Fyrir KR leikinn um daginn skellti hann þessum fram

 Hey strákar! Ef að fyrirtækin Apple og sjónvarpstöðin Sýn myndu sameinast, hvað væri þá nafnið á því fyrirtæki??

Svar Appelsín

 

Óli Stefán......sem trúir því varla að Tómas hafi fattað þennan algjörlega sjálfur

Þvílíkur leikur í gær

Mikið svakalega var ég ánægður fyrir hönd minna fyrrum félaga í gær. Þar duttu þeir aldeilis í gírinn og slátruðu Blikum 3-6. Ætli maður viti það nú ekki manna best að þegar að Grindavík hittir á svona leiki er fátt sem getur stoppað þá. Það voru allir að spila fantaleik og þó að hafi borið mest á senternum, Scotty og Andra og þeir að spila frábærlega þá var ég ótrúlega ánægður með Húna Hauks. Sá var að spila eins og sá sem valdið hefur og gaf hann strákum sem hann gæti hreinlega verið pabbi ekkert eftir.

Næsta verkefni okkar er einmitt Breiðablik og er ljóst að þeir mæta brjálaðir í leikinn. Okkar lið er einnig sært eftir að hafa misst úr höndunum allavega stig á móti Val. Verður því um hörkuleik að ræða þar sem við fáum okkar annan heimaleik í sumar en við erum búnir með þrjá útileiki í fyrstu fjórum umferðunum sem gerir árangur okkar kannski enn betri í fyrstu leikjunum.

Óli Stefán......sem er símalaus í augnablikinu en síminn gaf upp öndina í gær 

Eigum ekki möguleika

 Ég hef nú aldrei verið mikill aðdáandi Eurovision keppninnar. Í kvöld horfði ég hins vegar á keppnina því ég átti ekki annarra kosta völ. Ég var staddur í stúdentaveislu þar sem búið var að koma upp einum fjórum sjónvarpstækjum og græjurnar stilltar í botn.

Ég sjálfur heillaðist af einu lagi en það var lag Frakka og einnig ákvað ég að sína Dabba Rú stuðning í verki og fylgjast með Spáni en hvorugt þessara laga gerðu einhverjar rósir.

Mér fannst nafni minn og Regína standa sig og eru vel að 14.sætinu komin. Þessi keppni er náttúrlega fyrir löngu komin út í eitthvað allt allt annað en sönglagakeppni því það er alveg sama hversu léleg lögin eru nágrannaþjóðirnar velja alltaf hvort annað. Til að mynda vissi Sigmar þulur, sem mér finnst by the way ótrúlega góður, í 90 % tilfella hvaða land fengi 12 stig. 

Það á bara að skipa þessari keppni niður í austur og vestur og þá fyrst eigum við möguleika en á meðan austantjaldsþjóðirnar eru með þá getum við gleymt því að vinna þessa keppni, sem er svosem í góðu lagi mín vegna.

 

Óli Stefán........grætur það að fá aldrei til baka þessa tvo klukkutíma sem fór í að horfa á þennan skrípaleik 

Opnunarleikur

Við eigum næsta leika okkar á nýjum og glæsilegum velli þeirra Valsmanna. Mér skilst að það verði heljarinnar hátíð fyrir leikinn og leikurinn sjálfur svo hápunkturinn. Valur hefur ekki startað mótið eins og þeir hefðu kosið og koma því sjálfsagt eins og grenjandi ljón í leikinn og ætla sér að sprengja þessa Fjölnisblöðru strax. Auðvitað ætlum við að selja okkur dýrt og láta þá rauðu hafa aðeins fyrir hlutunum. Við erum núna að fara í okkar þriðja útileik af fjórum og væri auðvitað glæsilegt að komast taplausir í gegnum þá. Við höfum bara svo svakalega gaman af því sem við erum að gera og njótum augnabliksins í botn.

Ef að ég þekki Káramenn rétt, sem ég tel mig gera núorðið, þá eiga þeir eftir að standa sig eins og þeir hafa gert í öllum leikjum okkar hingað til. Þeir eiga s eftir að eigna sér stúkuna rauðu og láta söngvana óma um Öskjuhlíðina.

Ekki það að manni hlakki óhemju mikið til leiksinsþá bíður maður spenntur eftir orði dagsins hjá Kristó. Fyrstu viðtalsorðin voru "moldvarpa" og "gormur" og mér skilst að það hafi bara verið upphitun því næsta orð á að vera krefjandi 

Óli Stefán......sem vonar að Frikki sæti eigi eftir að standa sig annað kvöld í Belgrad 

Erfitt var það

Það er ekki laust við að tilfinningarnar hafi verið blendnar í gær þegar maður fór á sinn gamla heimavöll að takast á við gömlu félagana og stuðningsmenn. Við gerðum okkur svo mikið grein fyrir því hvað Grindavík er með gott lið og komum klárlega til að verja stigið. Reyndar erum við með þannig leikmenn að þeir eru alltaf líklegir að refsa og sú varð raunin i gær.

Ég get ekki sest niður og skrifað um leikinn án þess að minnast á frábæra stuðningsmenn Fjölnis. Það er engum blöðum um það að flétta að þeir hafa algjörlega stolið senunni í sumar. Í gær glumdi algjörlega í stúkunni þegar þeir sungu hvert snilldarlagið á fætur öðru. Það er ekkert nema frábært að spila fyrir framan svona stuðningsmenn

Ég er búinn að fá góðfúslegt leyfi frá Kristó til að upplýsa menn um pínu viðtalshúmor sem er í gangi hjá okkur Fjölnismönnum. Málið er að fyrir hvern leik kemur Kristó með orð dagsins sem að leikmenn verða svo að koma frá sér í sjónvarpsviðtali. Þetta byrjaði á móti KR þegar að herra Fjölnir Gunnar Már fór í sjónvarpið í viðtal. Hann fékk orðið moldvarpa sem hann skilaði svo frá sér með stakri snilld þegar var verið að ræða um teigana á Fjölnisvellinum. Í gær tilkynnti svo Kristó að orð dagsins væri gormur. Það lenti að þessu sinni á mér að skila því frá mér og talaði ég um að Grindjánarnir væru stórhættulegir inn í teignum því þetta væru svoddan djöfulsins gormar. 

 

Óli Stefán.....sem vonar að sínir fyrrum félagar spýti nú í lófana og taki Breiðablik í næstu umferð 

Stuðningsmannaklúbburinn Kári

Já það er alveg óhætt að segja það að þeir hafi slegið í gegn þessi hópur sem gengur undir nafninu Kári. Í fyrra var þetta 15 manna hópur sem að lét vel í sér heyra sælla minninga en þegar að við í Grindavík komum hingað töluðum við mikið um hvað örfáir geta gert mikið. Nú hefur þessi hópur stækkað og dafnað undir öruggri stjórn þeirra sem voru í fyrra og setja mark sitt á leiki. Í síðasta leik sungu þeir KR miðjuna í kaf. Auðvitað getur verið að þeir hafi dansað á línunni í þeim leik en þeir fóru alls ekki yfir hana enda flestir þessara drengja öðlingspiltar. Ég vona að þeir fjölmenni suður í kvöld og láti vel í sér heyra á góðu nótunum náttúrlega því þetta verður án efa erfiðasta verkefni okkar hingað til

Stuðningmannaklúbburinn KÁRI 

 

Óli Stefán......sem er kominn með spennuhnút í magann 

Hænuskref í átt að takmarki okkar

Ætli maður verði ekki að byrja þessa færslu á því að ræða aðeins um síðasta leik okkar Fjölnismanna. Við vorum þar að spila við stórlið KR og eftir mikinn barning þá tókst okkur að leggja þá að velli 2-1 eftir mjög svo dramatískar mínútur í lokin. Gunnar Már a.k.a herra Fjölnir tók þá víti sem Stjáni Hauks hafði náð í og skoraði af mikilli yfirvegun. 30 sek seinna flautaði dómarinn leikinn af við mikinn fögnuð Grafarvogsbúa. Ekki er endilega hægt að segja að við höfum átt sigurinn 100% skilið en ef menn standa sína plikt þá er alltaf möguleiki á þessu. KR átti tvö sláarskot á sömu mínútunni og svo einhver skot fyrir utan. Annað áttu þeir ekki þó að þeir hafi þjarmað að okkur. Við áttum t.d eitt sláarskot þannig að munurinn var kannski ekki eins mikill og menn vilja meina en jafntefli hefði kannski verið sanngjarnari úrslit allavega. 

 

 

 Stuðningur Káramanna og annarra Fjölnismanna var frábær eins og í fyrsta leiknum. Mér skilst að tæplega 3000 manns hafi verið á vellinum sem er náttúrlega met. Tommi Leifs sagði mér t.d að á svipuðum tíma í fyrra þegar að Fjölnir spilaði við Njarðvík á þessum velli þá hafi verið 8 mættir að horfa. Framfarirnar á skömmum tíma því gríðarlegar. Fjölnir er náttúrlega á sínu fyrsta ári í efstu deild þannig að skiljanlega er aðstaðan ekki alveg uppá 10 ennþá en það kemur með tímanum og á meðan verður fólk bara að sýna þessu skilning. 

Næsti leikur er náttúrlega mjög sérstakur fyrir mig og Eyþór Atla. Þarna mætum við á æskuslóðir að spila við Grindavík. Þeir hafa ekki byrjað eins vel og þeir hefðu viljað en hafa ber í huga að þeir spiluðu við KR úti og Val úti í fyrstu leikjunum. Ekki margir sem reiknuðu með stigum þar en ég held að liðið hafi komið mörgum í opna skjöldu með góðri spilamennsku. Þeir verða algjörlega brjálaðir í þessum leik og er ég á fullu að búa menn undir stríð. Hvað sem öðru líður þá verður þetta gaman og vona ég að sem flestir láti sjá sig.

 

Óli Stefán......sem er stoltur af Rikkanum sem að gifti sig í gær. Drengurinn er núna í góðum höndum á gallhörðum Arsenalaðdáenda