Box

Eins mikið og ég er nú fyrir íþróttir þá verð ég bara að viðurkenna það að ég hef aldrei náð að falla fyrir boxinu. Ég hins vegar get horft á allt mögulegt frá formúlunni og golfi upp í skautadans. Boxið hefur bara aldrei náð til mín. Ég ætla mér þó aldrei að fara að gera lítið úr annars þessari ágætu íþrótt því það eru furðulega margir sem hafa gaman af því að sjá hvern vitleysinginn á eftir öðrum lemja hvorn annan við mikinn fögnuð almúgans.

Það kom á fótbolta.net skemmtileg frétt í gær þar sem greint var frá því að hinn mjög svo skemmtilegi þjálfari (mundu eftir þessu þegar þú velur í liðið í dag Ási) Ásmundur Arnarsson hafi gefið okkur leyfi til að horfa á stórbardagann í boxinu sem hófst að ég held kl 04.00 í nótt. Við eigum náttúrlega stórleik við FH í dag þannig að þarna tekur Ási í annan pól en starfsbræður hans á Englandi og verður tíminn einn að leiða það í ljós hvort að þetta virkar hjá honum. 

Ég mundi hins vegar frekar leggja það á mig að vaka eftir gömlum CSI þætti heldur en þessu boxi þannig að ekki lagði ég þetta á mig. 

Óli Stefán......sem ætlar að leggja það á sig að fara á Players kl 13.30 í dag, þegar að þeir sem horfðu á boxið eru enn sofandi, að horfa á Middlesbrough-Arsenal

7.desember 2007

Takk kærlega fyrir afmæliskveðjurnar þið yndislega fólk sem munduð eftir mér. Þið hin getið bara étið það sem úti frýs. Þessi dagur er svosem ekkert merkilegri en aðrir dagar og er í raun svolítið asnalegt að halda upp á afmæli þegar maður er kominn yfir þrítugt því það gerir manni ekkert annað en að minna mann á hversu óhuggnalega gamall maður er orðinn. Ég er t.d í dag jafn gamall og mamma og pabbi voru þegar við fluttum til Noregs 1987 þá var ég 12 ára gamall. Ég er í dag fimm árum eldri en Janis Joplin, Jim Morrison og Jimmy Hendrix voru þegar að þau dóu. Ég er í dag 17 árum eldri en yngsti leikmaður mfl Fjölnis. Ég er í dag á sama aldri og Hjálmar Hallgrímsson, idolið mitt, var þegar að hann hætti í fótbolta. Þessar tölur tala sínu máli en þó er margt jákvætt við það að vera 32ja. T.d er ég þremur árum á eftir Gunna frænda sem er 35 ára(og bauð hann mér EKKI í afmælið sitt) Í dag er ég jafn gamall og Jankó var þegar hann kom hingað til lands í atvinnumennsku. Í dag er ég á sama aldri og Samuel L. Jackson var á þegar hann fékk aðeins hlutverk í auglýsingum.

Óli Stefán.....sem er það ungur ennþá að þetta dagatal gleður hans hjarta. Veljið dag til að fá jólasveina dans 

Reynsla Davíðs úr Grindavík

Helvíti væri ég mikið til í að skrifa niður brandara sem Dabbi sagði mér á æfingu áðan en ég er nokkuð viss um að ég fengi á baukinn ef hann myndi flakka hér. Ég á hins vegar til með að segja af þessum dreng eina svoleiðis snilldar sögu. Þannig var að þegar Davíð var að spila með Víking og Maggi Gylfa var að þjálfa þá. Víkingur var þá í úrvalsdeildinni eins og við í Grindavík og þeir voru að spila við okkur í Grindavík. (Þetta er leikurinn sem Mike skoraði okkar mark á síðustu mínútunni). Davíð var á bekknum og hefur greinilega leiðst að horfa á leikinn. Hann laumaði sér því í símann og hringdi á Mamma Mía og pantaði 16" pizzu með þreföldu beikonlagi. Hann bað sendilinn að koma með pizzuna upp á völl því hann væri að þjálfa Víking og héti Magnús Gylfason. 15mín seinna kemur einhver stúlka með pizzuna á bekkinn hjá Vikingum og spyr um Magga. Maggi snéri sér við og þá sagði stelpan "þetta gerir 2500kr" Maggi sem var ekki sáttur með sína menn á vellinum hellti sér yfir stelpu greyið sem hunskaðist í burt með pizzuna. Það besta er að Magnús veit ekkert hver gerði þetta og fór að kenna Vestamannaeyingum um þetta því þeir vildu ekki að Víkingur mundi vinna þennan leik og þetta hafi verið ráð til að koma honum úr jafnvægi.

Óli Stefán......sem getur ekki hætt að hlæja af þessari mynd 

 

Ási og fituprósenturnar

Það á heldur betur að koma mönnum í stand fyrir sumarið. Æfingarnar eru aldrei undir tveimur tímum því við bætum annað hvort útihlaupum eða lyftingum við æfingarnar. Þetta er samt langt frá því að vera leiðinlegt og er þessi tími yfirleitt fljótur að líða. Í dag vorum við t.d látnir mæla hámarksþyngd í lyftingum eða sú þyngd sem maður getur náð mest einu sinni. Yfirleitt er það bekkpressan sem heillar mest í þessum mælingum og það var sko engin undartekning á núna. Þvílíku öskrin og átökin sem menn voru að bjóða uppá til að ná kannski einu kílói meira en náunginn á undan. Við Óli Palli vorum tveir saman og ótrúlega samstíga í þessu öllu saman og náðum til að mynda að henda upp 95kg í bekknum. Ekki veit ég alveg hvað Ási ætlar að gera með þessar tölur en samt gaman að sjá hvar menn standa í þessu.

Við förum eins og ég hef oft sagt áður alltaf í pottinn eftir þessar lyftingar. Í kvöld vorum við svona 8 í pottinum ásamt Ása þjálfara að spjalla um daginn og veginn. Hitastigið á vatninu var frekar hátt í kvöld þannig að við sátum allir uppúr pottinum með fæturna bara ofan í vatninu. Allt í einu uppúr þurru segir Ási við mig "Óli þú veist að ég fitumæli svo allan hópinn" Ég semsagt er að spá í hvað fékk hann til að segja þetta við mig nánast uppúr þurru? Ég veit alveg að mér tekst alltaf að bæta aðeins á björgunarhringinn þegar við erum ekkert að æfa. En svo leit ég aðeins á strákana sem sátu við hliðina á mér og þá skildi ég þetta betur. Ég efast um að þeir hafi verið með meiri fituprósentu en svona 2 þannig að ég leit ekkert rosalega vel út með minn björgunarhring við hliðina á þeim. Samt held ég að það sé fínt að vera með svona 18-19 í fituprósentu á þessum tíma svo maður sýni framfarir í næstu mælingu sem verður vonandi rétt fyrir season. 

Óli Stefán..... sem er þrátt fyrir allt búinn að léttast um 2 kg síðan boltinn byrjaði 

Góð helgi

Það er heldur betur búið að vera nóg að gera um helgina. Á föstudag spiluðum við Fjölnismenn við Val í Egilshöllinni. Leikurinn var fínn sem slíkur og vorum við yfir 3-1 í hálfleik en töpuðum síðan 3-5. Gamli fékk að spila hafsent í leiknum og spilaði klukkutíma. Við fengum á þeim tíma 3 mörk á okkur og var ég í öllum mörkunum sem svíður nú svolítið en ég held samt að þau hafi nú ekki skrifast alveg 100% á mig. Að öðru leiti var ég mjög sáttur. Eyþór Atli hefur verið að æfa með okkur og staðið sig bara mjög vel. Hann spilaði fyrri hálfleik en fór svo útaf ásamt 5 öðrum leikmönnum í hálfleik.

Svona eins og nýjum leikmönnum sæmir þá bauð ég liðinu í "kaffi" eftir leik og var nátturlega bara stuð á okkur. Eyþór tók þar upp einn af mínum gíturum og sló algjörlega í gegn. Dóri hinn ungi varð algjörlega dolfallinn þegar Eyþór skellti sér í búning EnrikeIglesias og tók hina eiturmögnuðu ballöðu Hero. Ásmundur þjálfari segist hafa fengið ein 3 sms um nóttina þar sem hann var beðinn um að signa Eyþór Atla en þó ekki vegna knattspyrnu hæfileikanna heldur söng og gítarhæfileika ásamt einu öðru sem er kannski ekki við hæfi að skrifa um hér. 

Óli Stefán......sem er að fara á myndina Hitman eftir 10 min 

 

Próflestur

Það er orðið heldur langur tími síðan maður var í próflestri. Nú er bara kominn sá tími hjá mér og veit maður eiginlega bara ekkert hvað maður á að gera við allan þennan tíma. Reyndar skulda ég tvær ritgerðir sem ég er að vinna í og á að skila 6.des þannig að það fer nú einhver tími í þær.

Ég er að nota svona verðlaunataktík á mig þannig að ef ég skila af mér einum og hálfum klukkutíma í lærdóm þá verðlauna ég mig með einhverjum hætti. Núna er ég t.d að verðlauna afrek dagsins með því að taka á leigu Pirates of the Caribbean "at world´s end" og pínu nammi með. 

Æfingin í kvöld var frekar erfið að því leitinu að veturkonungur lét til sín taka. Ekki var hann þó að henda í okkur frosti eða miklum kulda heldur þá lét hann Kára um að blása all hressilega á okkur. Við náðum þó að hita vel upp og færa okkur svo á sparkvellina sem eru þarna allt í kringum Egilshöllina og spiluðum eldri á móti yngri. Auðvitað tapaði ég ekki þó að ég hafi nú ekki unnið heldur. Leikurinn endaði nefnilega 9-9. Strák pjakkarnir sem ég er að æfa með höfðu það að orði að ég og Eyþór Atli værum með forskot því við eigum að vera vanari svona roki. 

Á morgun eigum við leik við Val kl 18.30 í Egilshöllinni

Óli Stefán....... sem er búinn að setja upp allt jólaskrautið (eða tók allavega þátt í því) 

Söngvaskáld

Einn af mínum uppáhalds þáttum í ríkissjónvarpinu er þátturinn söngvaskáld sem er á þriðjudagskvöldum. Þar koma hinir ýmsu tónlistarmenn og spila og syngja lög sem þeir hafa samið eða bara lög sem þeim sjálfum finnst góð. Þeir mega víst bara hafa einn aðstoðarmann sem í flestu tilfellum spila á sem flest hljóðfæri. Í síðustu viku var Björn Jörundur á sviðinu og klikkaði hann sko ekki frekar en fyrri daginn. Núna er það Færeyska drottningin hún Eivör Pálsdóttir. Það er engum blöðum um það að flétta að þessi stúlka hefur alveg hreint ótrúlega hæfileika, bæði söng og svo það sem mér finnst gera hana frábæra, brilliant hljóðfæraleikari.

Ég er alltaf á æfingum á þriðjudögum frekar lengi en hún byrjar kl 18.30 með fótboltaæfingu í 90min eftir það förum við inn í lyftingasalinn í Egilshöllinni og tökum alveg klukkutíma prógramm þar. Að lokum svona svo maður lifi daginn eftir af þá förum við í gufu og pott í alveg 30 min þannig að þetta er þarna orðin frekar löng æfing. Þegar ég svo kem heim er þátturinn byrjaður og yfirleitt hálfnaður þannig að ég klára hann alveg og svo stilli ég á RÚV plús og horfi á fyrsta hálftímann.

Í kvöld var æfingin frekar flott. Við hituðum vel upp og tókum síðan 3x15 11 á móti 11. Venjulega er ég mjög ánægður þegar við spilum á stóran völl en í kvöld var ég bara ekki alveg mótiveraður í svona æfingu enda held ég að það hafi alveg sést á frammistöðunni. Mitt lið tapaði 4-2 og ég varnarmaður. Ég hafði ekki tapað á æfingu í fjögur skipti í röð en þarna brotlenti ég heldur betur. Ég var á þessari æfingu að kljást við Davíð nokkurn Rúnarsson sem er ótrúlega seigur fótboltamaður. Hann ber sig yfirleitt þannig á velli eins og hann sé bara að niðurlotum kominn en svo lumar hann á þessum líka sprengikrafti. Hann er svona pókerspilari fótboltans, alltaf að blöffa. Mér fannst hann erfiðasti andstæðingurinn minn í sumar þ.e sem ég þurfti að dekka og kljást við. 

Mér skilst að það eigi að vera nokkurskonar liðspartí eftir leikinn við Val á föstudag. Fínt plan að klára Valsarana og fara svo í pottinn með nokkra kalda. Enda svo í partí og finna sér slagsmál. Fullkomið kvöld ekki satt?

Óli Stefán ... sem var einu sinni skotinn í Eivör

Boltinn

Ég verð að fagna því að mínir menn (Fjölnir) tryggðu að ég held síðustu samningslausu mennina þannig að nú eru allir áfram sem voru síðasta tímabili utan þeirra tveggja sem voru í láni. Ég get alveg sagt það að þarna eru allt mjög frambærilegir fótbolta menn á ferð á besta aldri. Davíð Þór Rúnarsson er að ég held 29 ára og er elstur þeirra sem samið var við, hinir leikmennirnir eru 25-26 ára. 

Mikið svakalega var ég annars ánægður með að mínir menn í norður London kláruðu leik sinn við Wigan um helgina. Ég var að horfa á leikinn ásamt Bjössa Andrésar sem hefur það líti að vera stuðningsmaður Man Utd þannig að við urðum alltaf að skipta á milli stöðva til að geta fylgst með báðum leikjunum. Ég var þarna farinn að sjá fram á það að Arsenal ætlaði að klikka á að nýta sér klúður rauðu djöflanna og ná bara í eitt stig. En sem betur fer kláruðu þeir leikinn þrátt fyrir það að í liðið vantaði einhverja sex fastamenn og þar með 3 bestu leikmenn liðsins hingað til þá Fabregas, Hleb og Flamini sem hefur komið manna mest á óvart í vetur.

Óli Stefán .....sem er að útbúa matseðil fyrir vikuna 

Skotleyfi

Já hann var fyrir margar sakir nokkuð furðulegur leikurinn við ÍA í morgun. Fyrir það fyrsta þá er tíminn ekki sá sem maður á að venjast í fótbolta en leikurinn hófst 09.40. Það svosem var alveg ágætt þegar menn voru vaknaðir. Í öðru lagi þá er það svo furðulegt með þessa höll þeirra eins flott og hún er þá er hitastigið eða kuldastigið öllu heldur brenglað. Ef að það er um frostmark úti þá eru örugglega 8 gráður í mínus þarna inni. Svo er það allra furðulegasta við þetta allt saman að kóngurinn sjálfur gaf sínum mönnum skotleyfi á einn af okkar leikmönnum. Ási þjálfari skipti hópnum í tvennt og fengu þeir sem byrjuðu fyrri hálfleik en svo var bara skipt um lið og nýtt lið inná í seinni hálfleik. Þegar að seinni hálfleikur var svona 10 mínútna gamall gerist það að einn af okkar mönnum lendir í klafsi við hliðarlínuna. Þetta endar þannig að hann og leikmaður fallast eiginlega í faðma og leikmaður ÍA lendir undir honum og upp við vegginn við varamannabekkina. Þá bara missir Guðjón þjálfari þeirra það. Hann öskrar á Ásmund hvort að hann ætli ekki að taka þennan leikmann útaf því að hann leggi sína menn í hættu og það í æfingaleik. Ási hlustar ekkert á hann en þá brást kóngurinn hinn versti við og öskrar á sína menn að þeir hafi nú skotleyfi á leikmann nr 4. Þeir höfðu semsagt leyfi til að fara í hann og sjálfsagt meiða hann. Þessi strákur er nú ekki nema 16 ára og vissi ekki hvaðan á sig stóð veðrið. Þetta er með því allra daprasta sem ég hef orðið vitni af á annars minni löngu æfi só far.

Óli Stefán..... sem er ánægður með að hafa komist í gegnum 45min á miðjunni í dag 

 

p.s við töpuðum leiknum 0-2 þrátt fyrir fína spilamennsku 

Fyrsti leikur með nýju félagi

Árla morguns næstkomandi laugardag eigum við Fjölnismenn (skrítið að skrifa þetta) leik við pjakkana ofan af skaga. Maður fær nú samt nánast að sofa út því leikurinn byrjar ekki fyrr en 9.40 í Skagahöllinni. Föstudag eftir viku spilum við síðan við Jóa Helga og félaga í Val. Mér finnst það einmitt fínt hjá Ása þjálfara að byrja á þessum liðum sem við eigum að vinna, bara svona uppá sjálfstraustið og framhaldið. Fínt að vera búnir að spila nokkra svona leiki áður en við mætum síðan alvöru liðum. Ég sagði einmitt við strákana í kvöld að þetta væru bara leikir fyrir guttana í liðinu en þá var það einn snillingurinn sem greip þetta á lofti og sagði að þá fengu allir nema ég og Gústi Gylfa (Ágúst Gylfason, við sem þekkjum hann köllum hann Gústa) að spila. Hugsanlega fengi Davíð Rúnarsson hvíld þar sem hann er lang þriðji elsti 28 ára gamall.

Óli Stefán......sem að er svona rétt byrjaður að gera sér grein fyrir því hvað..............Gústi er gamall