Næturvaktin

Ég tók um helgina þrjár næturvaktir og kláraði síðustu vaktina í morgun (er ekki að tala um þættina vinsælu) . Í ljósi þess að hafa vakað allar nætur síðustu þrjá sólarhringa og sofið á daginn þá kemur það sjálfsagt ekkert á óvart að ég er ekki sofnaður núna kl 01.45. Menn hefðu nú getað haldið að það væri nú lítið mál að sofna þegar að vaktinni líkur en það er ekkert sjálfgefið. Ég sofnaði ekki fyrr um ellefu í morgun og vaknaði svo um fjögur í dag. Næturvakt er samt ekki fyrir hvern sem er og ég viðurkenni alveg að ég er ekki viss um að ég mundi ráða við það að taka mikið fleiri en þrjár í röð. Það að sofna í myrkri og vakna svo aftur í myrkri er ekkert grín.

Í kvöld var kosið um það hvert ætti að fara í æfingaferð en það komu þrír staðir til greina, Þýskaland, Portúgal og Tyrkland. Þeir strákarnir þekkja náttúrlega ekkert annað en sólina í Portúgal og fór það því þannig að farið verður þangað enn eitt árið. Ég hef nú farið nokkrar ferðirnar á mínum tíma og meðal annars farið fjórum sinnum til Þýskalands þrisvar sinnum á Portúgal og tvisvar Tyrkland. Þessir staðir eru allir góðir og hafa bæði kosti og galla. Ég held að kosningin hafi farið þannig að 11 kusu Portúgal 9 kusu Þýskaland og að lokum kusu tveir Tyrkland og getið þið tvisvar hver átti annað atkvæðið þar.

Á æfingu inní Egilshöll tókum við nokkrar sóknarfærslur ásamt því að spila. Það sem náði athygli minni óskiptri var hvernig hinn smávaxni þjálfari okkar Ásmundur Arnarsson skipti í lið. Haldið þið að hann hafi ekki raðað liðinu í röð eftir stærð og skipt þannig að risarnir voru saman á móti okkur sem eru í eðlilegri stærð. Ég notaði afsökun fyrir tapi á þessari æfingu sem ég hef ekki notað síðan í 6.flokki "þeir voru líka miklu stærri en við" 

 

Óli Stefán.....sem er nokkurn veginn sama hvert farið verður svo lengi sem það sé golfvöllur í næsta nágreni